По добиена писмена документација на мојот мејл, а како што се наведува, „во врска разгледување и утврдување на причините за незадоволството на учениците од IV-1, IV-2 и IV-3 клас, во Средното општинско училиште (СОУ) „ Ванчо Прке“- Виница, а во однос на незаконската и непедагошка постапка на професорката по Македонски јазик и литература, Тања Анакиева Давитковска“. По иницијатива на учениците, разговорите се водени во присуство на директорот на средното општинско училиште „Ванчо Прке“ Виница, Зоранчо Ангелов, класните раководители и психологот на училиштето Радмила Манчевска.
Кои се причините на незадоволството на учениците?
По добиената евиденција и документација за реализираните разговор/и со учениците ќе издвојам еден мал дел од содржината на разговорот (со заштита на имињата на учениците) кој следи: „Состанокот со учениците се одржа по иницијатива на учениците, во присуство на директорот на училиштето, класниот раководител и психологот на училиштето. Учениците се изјаснија дека имаат потреба да разговараат и да преземат нешто во врска со односот на професорката по Македонски јазик и литература, Тања Анакиева Давитковска.
Имено, учениците истакнаа дека на часовите по Македонски јазик и литература, повеќе се дискутира на теми кои се поврзани со интимниот живот на учениците, а многу помалку за она што е поврзано со наставниот материјал. Учениците истакнаа дека имаат потреба многу повеќе да посветат внимание на материјалот што е поврзан со матурата, но на тоа барање професорката останува пасивна и незаинтересирана. Учениците беа прашани од страна на психологот: Дали може разговорот со нив да се сними, при што истакнаа дека може. Некои од учениците беа спремни да си ги кажат нивните имиња, но некои не беа спремни… Ученикот: …истакна дека часовите по Македонски јазик и литература ги доживувале како изгубени и зборувале за теми кои не’ биле поврзани со наставната единица, при што прашувала за тоа на пример: Кога имале прв сексуален однос, дали сте гледале порничи…колку деца би требало да имаат…колку деца сакала да има нејзината ќерка и слично. Психологот го праша ученикот: Дали можеби тоа е поврзано со наставната тема и содржина поврзано со љубовни и сексуални врски или можеби со разработка на одредено дело? При што ученикот истакна: Дека не е поврзано. Ученикот спомна дека и на други паралелки зборувала така прашувајќи ги „Дали се офајдихте (по Винички)? И слично. На некој начин како да се изживува над нас“. Друга ученичка се надоврзува на изјавата на претходниот ученик односно соученик, истакнувајќи дека: „и да е поврзано нешто со одредени љубовни врски или односи, не може она секој ученик по ред да прашува: дали имал односи и со кој имал односи и да потенцира дека треба да бидеме искрени како она што е искрена за нејзините приватни работи. Јас не осеќам потреба моите приватни работи да ги споделувам ни со неа, ниту со класот, туку за време на час треба сега ни е најбитно матура да спремаме, а не смееме да користиме прирачници. Не обработуваме прашања и за небитни работи зборуваме на часот“.
Една ученичка сподели случка поврзана со неостанувањето на дополнителна настава на седми (7) час, кога проф. Тања Анакиева Давитковска инсистирала да останат после седмиотм(7) час, за да можат да ги надополнат изгубените часови кога таа била на боледување. Ученичката спомна дека тие не биле спремни тогаш да останат и решиле после седмиот час, да си тргнат, но тогаш ја сретнале професорката во ходникот која почнала да им вика и да им се заканува велејќи им ќе видите утре полошо може да ви се случи ако не се вратите, враќајте се и се симнала кај директорот да го запознае кажувајќи дека нивната класна ги наговорила, но тоа немало врска со неа, тоа било нивна одлука.
Наредниот ден на часовите почнала да ги испрашува за материјалот кој таа не го предала, бидејќи зборувала за приватни теми. Потоа професорката (Тања) инсистирала од учениците да се извинат, но тие не чувствувале потреба да се извинат.Учениците истакнаа дека се чувствувале многу стресно и истакнуваат дека кога одговараат кај некој од нив рацете им се тресат. Психологот ги праша учениците: Што е тоа со што си правите да се чувствувате така? А, учениците истакнаа дека „кога професорката прашува, не дава простор за размислување, туку веднаш бара одговор и ако згрешиш, тогаш не ти дава да продолжиш. Нема никаква хармонија на часот и нема поврзаност, таа како да сака страв да имаме на неа. Учениците со нивните искажувања истакнаа дека генерално професорката применува авторитарен начин на комуникација без почитување на личноста на ученикот.
Една ученичка истакна, дека: „ кога професорката ќе влезе на час чувствуваат тензија, а кога една сокласничка прашала за некој збор, професорката одговорила: „ Мене тоа не ме интересира пишувајте како што знаете“. Од страна на психологот беше поставено прашање во насока: Дали тоа значи дека не ви се дава објаснување за прашања кои ви се битни поврзани со наставната единица, за што учениците одговорија потврдно. Еден од учениците спомна една ситуација која се случила претходниот ден, кога професорката им дала еден текст кој требало да го акцентираат на винички дијалект, но на ниту еден ученик не им било точно. Тогаш ученичката ја прашала професорката: Како треба да се акцентира, а таа одговорила: „Треба така како што треба“, без да им даде објаснување, за што ученикот смета дека тоа не е соодветен одговор за професор посебно за нешто што никој од учениците не го направил. Тогаш ученикот и рекол на професорката дека: „сокласничката убаво прашала, но вие каков одговор ѝ дадовте и кажавте така како што треба“, а професорката одговорила: „Ако сакаш иронија јас можам дупло“….“. Ова е само еден мал дел од евиденцијата за реализираниот разговор на незадоволството на учениците од односот на професорката Тања Анакиева Давитковска, искажано пред директорот, класните раководители и психологот на СОУ „Ванчо Прке“ Виница.
Писмена опомена од директорот на СОУ „Ванчо Прке“-Штип, за професорот по Македонски јазик и литература
На професорот Тања Анакиева Давитковска, вработена во СОУ „Ванчо Прке“ Виница, на работно место – Наставник по Македонски јазик и литература, поради непрофесионален однос кон учениците на IV-1, IV-2, IV-3 клас со што е нарушена позитивната клима во паралелките и непочитување на потребите и личноста на ученикот….И не само тоа во описот стои меѓу другото: „ …..По извршената анализа и спроведените разговори со учениците од страна на класните раководители, директорот и психологот може да се констатира дека со својот однос вработената Тања Анакиева Давитковска покажала непрофесионален однос со непочитување на потребите и личноста на учениците со што придонела кон нарушување на наставната клима во паралелките IV-1, IV-2, IV-3 клас…..Со оваа опомена, Ве предупредуваме дека понатамошното непочитување на работните обврски може да доведе до преземање на построги дисциплински мерки, согласно законската регулатива… Стои во писмената опомена“.
Што констатирам
Наставник по Македонски јазик и литература, Тања Анакиева Давитковска, вработена во СОУ „Ванчо Прке“ Виница, има сериозни прекршувања согласно Законот за средно образование, Законот за наставници и стручни соработници, Статутот на училиштето и Етичкиот кодекс на однесување на наставниците, стручните соработници на СОУ ОУ „Ванчо Прке“ Виница, а тоа е сериозно прекршен етичкиот кодекс на професионален однос, прекршени се педагошките – методолошки-дидактички прописи и законитости. Прекршена е Конвенцијата за правото на детето, како меѓународен документ, кој е ратификуван во Република Македонија.
За ваквиот неетички однос на наставникот Тања Анакиева Давитковска, треба да расправа самото училиште, пред се’ Училишниот одбор, Советот на родители, Локалната самоуправа, односно советот на општина Виница.
Ги повикувам
Министерството за образование и наука, министерката Весна Јаневска, да ги ангажира советниците на БРО и Државните просветни инспектори да извршат заедничка интегрална евалуација во ова средно училиште за целокупната поставеност од сите стручно-педагошки и дидактички планови и програми за нивна реализација. Се’ во интерес на учениците.
На крај
Се обраќам кон сите вработени, наставници и стручни соработници на СОУ „Ванчо Прке“ Виница, почитувајте ги учениците и тие ќе ве почитуваат.
Нека Ви биде пример ХЕРОЈОТ ЈОВАН КОСТАДИНОВ од IV-6 клас, кој е симбол на една нова генерација од неговиот чин се учи да се биде човек!
Автор: Ѓорѓи Илиевски, Виш просветен инспектор во пензија за НетПрес
