Издавачите во Србија го бојкотираат Министерството за култура

Педесетина издавачи одлучија да го бојкотираат конкурсот на Министерството за култура за откуп на книги, да не учествуваат на меѓународните саеми што ги организира Министерството и привремено да ја запрат доставата на задолжителните примероци книги до Народната библиотека на Србија и Матица српска.

Сите членови на Здружението на професионални издавачи на Србија, дел од Здружението на издавачи и книжари на Србија, како и дел од независните издавачи, решија да го бојкотираат Конкурсот за откуп на книги за јавни библиотеки, кој неодамна го распиша Министерството за култура.

Понатаму, тие нема да учествуваат во заедничките настапи на меѓународните саеми на книги, доколку тие настапи се одржуваат во организација на Министерството за култура, ниту ќе дозволат нивните книги да бидат изложени на тие настапи.

И трето: до понатамошно известување, ја запираат доставата на задолжителните примероци книги до Народната библиотека на Србија и Библиотеката на Матица српска.

„Одлуката да го бојкотираме конкурсот за откуп ја донесовме поради игнорирањето на предлозите на издавачите, поради лошиот модел на откуп на којшто со години укажувавме, поради намалувањето на буџетот за откуп, поради обидот на Министерството со буџет предвиден за една година да се откупи двегодишна издавачка продукција, поради нетранспарентноста на конкурсот, поради рестриктивните услови со ретроактивно дејство и поради тоа што политиката на Министерството во областа на книгата и условите на конкурсот за откуп ги загрозуваат интересите на читателите, библиотеките и издавачите“, стои во нивното соопштение.

Тие сметаат дека „доколку Министерството одлучи да го спроведе овој конкурс и покрај сè, нема да може да ги сокрие од јавноста очигледните факти: на овој конкурс нема да учествува најголемиот број српски издавачи и со него нема да бидат опфатени убедливо најзначајните книги објавени на српски јазик во 2024 година.“

Предупредуваат дека последиците од таквата одлука на Министерството ќе бидат јасни: јавните библиотеки ќе останат без поголемиот дел од релевантните книги, читателите нема да можат да ги користат услугите на библиотеките што веќе ги платиле, а следната година ќе бидат објавени помалку книги на српски јазик.

Сепак, наведуваат дека во наредниот период ќе се обидат да најдат алтернативни начини за соработка со библиотеките, за да им овозможат на корисниците пристап до книгите.

Зад оваа одлука, засега, застанаа педесетина издавачи, вклучително и најголемите – Лагуна и Вулкан.

Извор: https://vreme.com/