• Горан Упале
По завршувањето на својата богата кариера, Горан Попов ја основа менаџерската агенција „ГП3“, во која што тој и неговите партнери претставуваат солиден број фудбалери од овој регион.
Македонецот има силни врски и во Украина, со оглед на тоа што четири години настапуваше за најголемиот клуб во земјата, Динамо Киев, па неговите клиенти обично имаат добра „продажба“ на овој моментално зафатен пазар од војна.
Попов во интервју за руски „РБ Спорт“ изјави дека неговите украински партнери барале во иднина да не се нудат фудбалери од Србија, а причината биле политичките ставови на српскиот претседател Александар Вучиќ.
„Играв за Динамо Киев, но работам истовремено и во Русија и во Украина. Не сакам проблеми, бидејќи политиката е многу опасна работа. Дај Боже сето ова да заврши и луѓето од двете земји да продолжат да живеат и да работат нормално.
Ние, агентите, треба да работиме со сите, но има клубови од Украина кои не сакаат да носат играчи од Србија. Воопшто не размислував за тоа додека некои спортски директори на украинските клубови ми рекоа: „Горане, те молам повеќе да не ни нудиш фудбалери од Србија“, рече Попов.
На прашањето каква врска има Србија со целата ситуација, 40-годишниот струмичанец одговори:
„Вучиќ ја поддржува Русија. Затоа не сакаат српски фудбалери“.
Поранешниот македонски бек зборуваше на повеќе теми за „РБ Спорт“, но сите беа поврзани за тамошниот фудбал.
