Јапонија и Кина го одржаа својот прв економски дијалог во последните шест години, настан кој има за цел да ги намали тензиите меѓу азиските земји бидејќи тие се соочуваат со трговски притисок од Соединетите држави.
„Имавме многу жива дискусија. Заврши брзо, но мислам дека средбата беше плодна“, изјави јапонскиот министер за надворешни работи Такеши Иваја за новинарите по средбата со неговиот кинески колега Ванг Ји.
На прашањето дали се разговарало за американските тарифи, Иваја коментира дека тоа не била главна тема на разговор на ниту еден од состаноците одржани денес.
„Се договоривме со Јужна Кореја да продолжиме да работиме блиску и да комуницираме јасно со САД“, рече тој, мислејќи на одделните министерски разговори одржани претходно истиот ден со Јужна Кореја.
Тој не откри повеќе детали ниту кажа што разговарал со Ванг во врска со американските тарифи.
Состанокот се одржа помалку од две недели пред американскиот претседател Доналд Трамп да ги објави новите царини на 2-ри април. Тоа, исто така, следи по неуспешните обиди на Јапонија директно да лобира кај американската влада за ослободување од царините.
Иако Кина е најголемиот трговски партнер на Јапонија, двете земји се во несогласување околу голем број прашања, вклучително и територијалниот спор и забраната што Пекинг ја воведе за морска храна од Јапонија по испуштањето на отпадните води од погодената нуклеарна централа Фукушима Даичи.
„Островите Сенакус и извозот на јапонска морска храна и земјоделски производи, како говедско месо, во Кина беа меѓу темите за кои се разговараше со Ванг“, рече Иваја.
Јапонското Министерство за надворешни работи пред состаноците го минимизираше влијанието на американските царини врз разговорите. Јапонија ќе одговори доколку Кина го покрене прашањето за американските царини во економскиот дијалог, но координиран одговор е малку веројатен, изјави претставник на јапонското Министерство за надворешни работи.
Анкетите покажуваат дека јапонските фирми во Кина станале попесимисти за водење бизнис во Кина поради зголемените геополитички тензии, заладените билатерални врски и интензивната конкуренција од кинеските фирми. Сепак, обемот и близината на кинескиот пазар значат дека во интерес на Јапонија е да одржува стабилни односи.
„Големите јапонски компании сè уште профитираат од Кина, така што Јапонија нема друг избор освен да продолжи да работи со Кина“, рече Норихико Ишигуро, претседател на Јапонската организација за надворешна трговија.
Пекинг исто така презема чекори за стабилизирање на врските со своите главни трговски партнери бидејќи се соочува со зголемени царини од Вашингтон.
Јужнокорејскиот министер за надворешни работи Чо Тае-јул, исто така, им се придружи на Иваја и Ванг во саботата наутро за да одржат трилатерални разговори, барајќи понатамошна соработка и поставување на основата за потенцијален лидерски самит додека земјите се борат со економските превирања и зголемените глобални политички тензии.
