Инсистирањето на гаранции од македонска страна за уставните измени се покажува и повеќе од оправдано имајќи го предвид габаритот на преговарачката рамка со Европската Унија во која се вметнати и протоколите, како и постојаното потсетување од бугарска страна дека вметнувањето на Бугарите во македонскиот Устав не е единствениот услов, пишува Сашо Таневски за „Нова Македонија“.
Официјална Софија го повтори тоа во неколку наврати, јасно ставајќи до знаење дека македонската страна била навремено предупредена дека Бугарија нема да се откаже од сите наведени точки во протоколите, а кои, меѓу другото, се однесуваат и на идентитетски и историски прашања.
– Многу е важно да се знае дека уставните измени и впишувањето на Бугарите во Уставот како државотворен народ не се единствениот услов… Ние нема ниту да промениме нешто во нашето мислење, ниту пак има нешто што ќе го отфрли т.н. европскиот консензус што беше постигнат во 2022 година – изјави Георг Георгиев, министер за надворешни работи на Бугарија.
Тој, гостувајќи на една бугарска телевизија, појасни дека откако претходната влада на Македонија го прифатила францускиот предлог, сега ЕУ е таа што стои зад консензусот и зад бугарските барања.
– Прво, не се Бугарите, туку е Брисел. Целата ЕУ стои зад тој консензус. Тоа е многу важно и е услов што треба да се повторува постојано. И второ, во тој европски консензус се и протоколите, патната карта за заедниците и малцинствата, придржувањето кон договореното за добрососедството… Сето тоа треба да биде факт. Во спротивно нема да има исполнување на европскиот консензус, нема да има исполнување на заклучоците од Советот – објаснува Георгиев.
Слични изјави во неколку наврати даде и бугарскиот претседател Румен Радев, потсетувајќи дека Македонија мора да ги исполни сите точки од протоколите и од Договорот за добрососедство и пријателство и дека земјава се обврзала на тоа кога ја прифатила преговарачката рамка со ЕУ.
И додека Бугарија става јасно до знаење дека уставните измени не се последниот услов што Македонија треба да го исполни, Брисел продолжува да притиска за промена на Уставот како единствена можност земјава да го продолжи евроинтегративниот пат, без притоа да даде некакви гаранции или, пак, да реагира на забелешките на официјална Софија дека тоа е само еден од условите што земјава ќе треба да ги исполни.
Од сегашна перспектива излегува на површина кусогледоста на поранешната македонска влада, која само за да ѝ се додвори на меѓународната заедница прифати преговарачка рамка обременета со протоколи и патокази што буквално ја туркаат земјата кон идентитетско самоуништување.
Најнова потврда дека либералните европски елити неразумно целосно застанаа зад противправните и ирационални барања на бугарската страна, претходно форматирани во протоколите во т.н. француска рамка, оглушувајќи се на македонските барања фундирани на меѓународното право и Копенхашките критериуми за евроинтеграции, е изјавата на шефицата на европската дипломатија Каја Калас во која ја исклучува Македонија од земјите од регионот што се кандидатки за ЕУ.
Таа, зборувајќи на завчерашниот состанок на министрите за надворешни работи на земјите членки на ЕУ, во ниту еден момент не ја спомена Македонија во обраќањето во кое ја претставуваше состојбата во сите земји кандидати. Калас упати политичка порака до БиХ и до Србија, ги пофали Албанија и Црна Гора, го спомна и Косово, но целосно ја прескокна Македонија и не спомена ниту еден збор. За Албанија и за Црна Гора рече дека прават добри чекори и добри реформи и дека се надева на позитивни приказни околу нив. На Србија ѝ прати порака дека евентуално учество на прославата на 9 Мај во Москва нема да биде дочекано лесно од Брисел, додека за БиХ рече дека е во уставна криза и дека секој обид да дојде до нејзин расцеп е неприфатлив за ЕУ.
Шефицата на европската дипломатија истакна дека стабилноста и безбедноста на Западен Балкан се суштински за ЕУ и дека ако се погледне картата на Европа, јасно е дека овој регион е дел од Европа.
Пред извесно време Калас беше и на мини-турнеја низ Балканот, но и тогаш ја одбегна земјава. Единствено претседателот на Советот на ЕУ, Антонио Кошта, најави дека во средината на мај ќе ги посети шесте земји од Западен Балкан.
Како и да е, повеќе од сигурно е дека игнорирањето на земјава од официјален Брисел ќе продолжи и во следниот период како начин таа да биде принудена да ги направи уставните измени и уште повеќе да си го закомплицира европскиот пат, кој очигледно може да финишира само со целосно идентитетско обезличување.