Зошто расте цената на златото?

Цената на златото утрово достигна историски максимум од 2.990 долари за унца, продолжувајќи го трендот на раст кој се засили оваа недела. Несигурноста на финансиските пазари, осцилациите на берзите и трговските тензии придонесуваат инвеститорите да го бараат златото како сигурно засолниште за капитал.

Берзите во Азија со различни движења

На азиските берзи денеска е забележан претпазлив раст, главно поради корекција по претходните загуби. Јапонскиот индекс Nikkei порасна за 0,9%, додека индексите во Шангај, Хонг Конг и Австралија бележат раст меѓу 0,5 и 2,4%. Во Јужна Кореја, пак, акциите забележаа пад.

Во Кина, властите најавија нови мерки за стимулирање на економијата, што донесе мал оптимизам на пазарите. Сепак, глобалната неизвесност продолжува да влијае на инвеститорите, особено по вчерашниот пад на Wall Street, каде што S&P 500 и Nasdaq влегоа во територија на корекција, губејќи повеќе од 10% од нивните рекордни вредности од февруари.

Доларот во пораст, еврото слабее

Паралелно со зголемувањето на цената на златото, доларот зајакна на девизните пазари. Индексот на доларот се зголеми на 103,98 поени, што е раст во однос на вчерашните 103,60 поени.

Курсот на доларот во однос на јапонскиот јен порасна од 147,75 на 148,60 јени, додека еврото ослабе на 1,0845 долари, во споредба со вчерашните 1,0885 долари.

Цените на нафтата исто така во пораст

Нафтените пазари бележат благо зајакнување по вчерашниот пад. Цената на брент нафтата на лондонскиот пазар порасна за 0,6%, достигнувајќи 70,30 долари за барел, додека на американскиот пазар цената се зголеми за 0,66%, на 66,95 долари за барел.

Порастот на цената на златото се должи на зголемената побарувачка од инвеститорите кои бараат стабилно и сигурно вложување во услови на неизвесност. Дополнително, трговските тензии и економските ризици ги принудуваат вложувачите да го напуштат акциите и да се свртат кон благородните метали.

Со оглед на тоа што финансиските пазари остануваат под притисок, а глобалната економија се соочува со предизвици, аналитичарите очекуваат цената на златото да остане висока, а можеби и да достигне нови рекордни нивоа во наредните недели.