ЗАГИНАА ЧЕТИРИ ЛИЦА, ИМА И ПОВРЕДЕНИ: Кој го погоди интернатот во Суџа?

Добивај вести на Viber

Загинаа најмалку 4 лица, а Украина и Русија меѓусебно се обвинуваат за смртоносниот напад на интернатот во Суџа, во Курск во Русија. 

Украинските вооружени сили објавија дека Русија лансирала бомба од руска територија која погодила интернат во Суџа, при што загинале најмалку четворица. Внатре имало луѓе кои се подготвувале за евакуација.

Спасени се или укажана им е медицинска помош на 84 луѓе. Четворица од повредените се во тешка состојба. Спасувачките напори за расчистување на урнатините продолжуваат. Украинскиот претседател Володимир Зеленски изјави дека нападот врз Суџа, на 12 километри од границата со Украина, покажува како Русија ја води војната.

„Тие ја уништија зградата иако таму имаше десетици цивили. Вака Русија водеше војна против Чеченија пред неколку децении. Тие убиваа Сиријци на ист начин. Руските бомби на ист начин ги уништуваат домовите на Украина“, тврди Зеленски. 

Руското Министерство за одбрана рано утринава објави дека украинските сили извршиле „целен ракетен напад врз интернат во градот Суџа“ од територијата на Украина. Вршителот на должноста гувернер на рускиот Курски регион, Александар Хистајн, ги обвини силите на Киев за нападот и рече дека уште нема сигурни информации за бројот на потенцијалните жртви.

Портпаролот на украинската армија, Олексиј Дмитрашкивски претходно во видео објавено на Фејсбук изјави дека речиси 100 луѓе се под урнатините, а, како што рече, главно постари и изнемоштени луѓе. Руската инвазија на Украина почна на 24 февруари 2022 година. Се очекува дека во наредните месеци, американскиот претседател Доналд Трамп ќе се заложи за ставање крај на војната.