• Саше Љолес
Босанскиот кошаркар од редовите на Шарлот Хорнетс, Јусуф Нуркиќ, во разговор со домашните медиуми изјави дека е задоволен што НБА лигата се обидува да „продре“ на стариот континент, но се надева дека тоа нема да доведе до згаснување на Евролигата.
Нуркиќ веќе десет години е во Соединетите Американски Држави, но рече дека секогаш со внимание ја гледа Евролигата и посакува натпреварувањето да го задржи својот препознатлив формат.
„Евролигата е прекрасно натпреварување. Стариот континент обожава да ги гледа мечевите од елитата, затоа сметам дека не треба да претрпи никакви промени. Убаво е што НБА лигата сака да се прошири и во Европа, но тоа треба да се случи без влијание на Евролигата.
Имам многу пријатели што настапуваат таму, знам дека клубовите се одлично организирани и располагаат со сериозни буџети. Можеби не се богати како НБА франшизите, но дел од нив се навистина финасиски моќни“, изјави Нуркиќ.
Шпекулациите за промена на форматот во Евролигата се зголемуваат откако стана јасно дека НБА лигата и ФИБА планираат да воведат ново натпреварување, кое може да опфати екипи од четири континенти. Наскоро се очекуваат поконкретни информации.
