За партиите, протестните движења, жртвите, манипулациите, „искористувањето“...

Ако емотивните манипулации од типот „протести може да се злоупотребат“ е „аргументот" против протести, тогаш Македонците треба да се збогуваат со какви било протести за било што. Сепак сме народ со просечно IQ 80, што значи дека пола од тие се под тоа ниво, а пола се над. Тоа што познавам паметни луѓе, за жал ми создава илузија дека сепак во Македонија е можно да се смени нешто на подобро. Меѓутоа...

Пола сме со IQ под 80. Па така има логика што непромислени њухови и инсинуации може да ви сменат мислење за протести, а штом сте така подложни на месење мозок како тесто, тогаш реално не заслужувате ништо подобро. Зашто и не можете. Едноставно тој програм кај вас проаѓа, се инсталира чипот, и се иде даље.

Ај едно долго дробење кое ми се собира веќе пар недели.

1) НА ТЕМА ПАРТИИ И ПРОТЕСТНИ ДВИЖЕЊА

Власта и други манипулатори успешно убедија дел од населението (и самите протестни движења) дека ниеден протест не е валиден освен ако не воспостави силен „purity testing", односно да немало никакви партиски влијанија или членови во протестот.

Тие што го знаат терминот „purity testing" знаат колку е просто отровен и автодеструктивен.

Да се инсистира на оддалечување од сите партии е само по себе сулуд и самопоразителен маневар.

Зашто за еден протест или движење да бидат валидни, треба да се ОПШТОПРИФАТЕНИ и да имаат ШИРОКА ПОДДРШКА - а тоа ги ВКЛУЧУВА и ПАРТИСКИ определените луѓе. Партии СМЕАТ и да учествуваат, и да одржуваат, и да организираат протести.

Во тоа нема ништо чудно, лошо или необично, впрочем тоа е многу нормално во сите земји. Тука ќе ги додадам и невладините организации - што повеќе поддржуваат некаков протест, тоа подобро.

Во спротивно ќе бидете 200 души и ќе си отидете дома. Не ми се свиѓа таа реалност, ама реалноста е таа. Сум бил на протест со 10 независни пријатели, само за да сфатиме дека останатите 300 учесници на протестот се организирани преку партија. И така нашата кауза, нашиот протест доби валидност поради масовноста на тие што дојдоа од партиите.

Сеа замисли да бевме само ние 10? Па немаше никој ни да дојде да снима или да извести.

Сакате непартиски и комплетно идеолошки неутрални протести? Тогаш нека ви е со среќа. Никогаш нема да смените ништо.

Што е баш и целта на ова перење мозок кај што ве убедија дека партиски влијанија во протести се некаква шуга од која мора да се миете додека не ви се одлепи кожата. У старт сте грешни граѓани, и мора да се миете и да и докажувате на Власта колку сте уствари чисти, доблесни, аполитични, непартиски, онака вие сте просто ентитети без идентитет и мислења и сте тука просто да поднесете некое барање и да си отидете дома.

Или, ако сте религиозни, да си речете „така сакал Господ“, да си запалите свеќа после секоја трагедија и да си отидете дома.

Е, на тоа сакаат да се сведе секое идно незадоволство. Затоа што без разлика кој пат ќе го фатите, тоа што конкретно ќе се го произведете како пракса во општеството е тргање на одговорноста на сите одговорни луѓе. Односно, нормализација на неодговорноста, која секогаш ќе може да се објасни со натприроден фактор.

„Кралот не е крив пошто така сакал Бок.“

„Кој сум ја да протестирам коа не сум совршен."

Идеме даље.

Дај прајте разлика меѓу НАТпартиски и НЕпартиски.

Протестите треба да вклучуваат партии но да бидат НАТПАРТИСКИ. А не да бидат "непартиски"! Таа чивија за жал е добро набиена во македонскиот мозок, па сега тој се мачи нешто да смени кога го убедиле да си ги врзе рацете и едната нога па сега само клинка и нешто као протестира.

А такви ве сака секоја власт. Многу лесна мета сте. Многу ситно мевце за преџвакување.

Едно е власт да се справи со 5000-10.000 независни и неопределени демонстранти кои прво убаво се измиле со сапун за да му докажат на Владетелот дека они се чисти, невини, непартиски и неидеолошки и перфектни. Но меѓу кои сигурно има неколку интелектуалци или професори, или (видовме деновиве!) ДЕЦА или РОДНИНИ на некои „неподобни" тогаш Владетелот секако ќе им залепи етикета дека се „платеници" и ќе си продолжи по старо. Ова е мрвка која секоја власт лесно ќе ја голтне без да трепне.

Друго е власт да се справи со 100.000, 200.000, 400.000 демонстранти меѓу кои има разни обединети партии, здруженија, итн. дури и странски претставништва па и членови на самата партијата на власт - кои бараат промени. Како ќе дисквалификуваш толкаво масовно и разнолико движење тогаш? Кој ќе фарбаш тогаш како странски платеник, синот на министерот у влада?

Тој залак не може ни да се гризне, зашто не е веќе залак туку животно големо колку тебе.

И целта на овие суптилни, индиректни манипулации е ниеден протест да не порасне во силно животно туку да остане мал залак.

Затоа кај нас се тера пропаганда дека протест е само валиден ако сите во протестот се политички или партиски неопределени или немаат никаква идеологија; тоа произведува ниска излезност на протестот, што потоа повлекува дисквалификација на протестот дека или биле премалку луѓе (нормално дека ќе се малку ако си им забранил да вклучат мнозинство од населението кои се партиски симпатизери), или штом се толку малку, тогаш движењето е неавтентично и нема широка народна поддршка, па од тука мора да е „раководено од некој матен центар."

Најкомичен индикатор дека протестното движење е силно изманипулирано до степен на кастрација беше оној дечко пред платото на УКИМ кој нејќеше медиумите да снимаат. Автогол! За секое протестно движење или кауза да расте, му треба баш што поголема јавност, поголема видливост, што повеќе медиуми итн итн. Дел секако ќе се "платеници" ама што ти е гајле, тоа е вообичаен дел од политички и општествен активизам, секогаш ќе имаш противници и критичари. Нема лош публицитет - не е битно дали зборуваат добро или лошо за тебе, сѐ додека зборуваат, ти си тема и актуелен феномен.

И наместо тој дечко да седне и да ги покани медиумите да го снимаат и да поставуваат прашања, он ја свитка опашката и избега зборувајќи за некаква приватност и платеници. (Приватност на јавен простор и на јавна активност?! Чивијата ептен влегла.)

За да сфатите колку е оваа матрица забегана, прашајте се:

- Дали утре Зелена партија не смее да протестира за еколошка катастрофа?

- Дали прогресивна партија не смее да протестира против фемицид или системски дискриминации?

- Дали на крај краева националистичка партија не смее да протестира против промена на државно име?

Нормално дека не само што смеат, туку тоа и се очекува од нив! И зошто никој не очекува од протести против промена на името тие ликови да бидат „непартиски“ или политички неопределени?

Конечно, како може во ситуација кога една партија ја има скоро целата власт и на државно, и на локално, и на собраниско ниво, на вас да ви се криви сите опозициски партии и да се пазите од нив?! Па што треба опозиција да прави, да ракоплеска?

Истата матрица се наметна и во Србија, па нормално дека Вучиќ нема да биде сменет зашто нема КОЈ да го смени. Затоа што им го испра мозокот на луѓето дека сите освен него се потенцијални непријатели на државата кои само сакаат нешто да „искористат“, обично во ќар на некои сили „од надвор“, и еве затоа ќе си ги пука со звучни топови, додека овие не се изморат, разочараат и не си отидат дома.

Целта е баш таа „деполитизација“ (побарајте си го Vlad Vexler на Јутјуб, политички филозоф, да ви објасни), кај што како долго варена жаба на тивко, и убедени дека „сите се исто лоши“, евентуално ќе си легнете на брашното и ќе си живеете цел живот со една династија на власт.

2) НА ТЕМАТА ЖРТВИТЕ ВЕЌЕ НЕ СЕ БИТНИ ЗА ПРОТЕСТОТ

Во протестите не е битна една личност, протестите се прават за пошироки општествени промени. Протестите против полициско насилство не се сведоа само на оддавање помен за Мартин Нешковски, па така ни овие не може да се сведат замо за Фросина, или сите жртви во Кочани. Протестите се прават за да спречат идни вакви трагедии, тие се движења за промена, не се оддавање помен или почит на една, друга, третата индивидуа. (Така што какво е тоа очекување дека „веќе не им било битно за Фросина"? Па станува збор за сите идни потенцијални Фросини бе девојче! Станува збор и за мене, за тебе, за некој друг не дај боже кој може да биде прегазен или изгорен утре.)

3) НА ТЕМАТА ИСКОРИСТУВАЊЕ ПРОТЕСТИ

Ја никако да разберам за какви „злоупотреби“ и „искористувања“ на протести станува збор?

Дали се мисли на „искористување“ на протести за политички рејтинг на пример? Ако е така, што е тука невалидно?

Дали СДСМ не требаше да трпат удари по нивниот политички рејтинг поради Ласкарци, Модуларната, Дурмо? Дали тогашните опозициски партии не требаше да добијат некаков рејтинг особено ако критиките им биле издржани?

Исто и сега - зошто ВМРО-ДПМНЕ да не трпи штета на нивниот рејтинг за несреќа случена во нивно време? И зошто опозициските партии да не добијат покачен рејтинг ако критиките им држат?

Треба и едното и другото, тоа е нормален процес на причина и последица.

Како инаку треба тој што згрешил да научи од грешките, а тој што треба да поправа да дојде во ситуација да поправа?

Дали протестите против Трамп во САД не им користат на Демократите? Секако дека им користат. Дали протестите против носење маски за време на пандемијата не им користеа на Републиканците? Секако дека им користеа. И сега што? Некој некого „искористил“?

Ако се мисли на некакво друго искористување нека ми објасни некој. Со која цел. Која е користа од „искористувањето“, „злоупотребата“ итн. Според мене не е неразумно партиски рејтинзи да трпат промени, во позитивна или негативна насока, после непогоди, или успеси итн.

Не знам како само во Македонија стана некако страшно партија што усрала нешто да трпи штети на нејзиниот политички рејтинг, а партија што и опонира да не смее да ќарува позитивен рејтинг од тоа.

Ако не ни се свиѓаат партиите, треба да направиме нови кои ќе ни се свиѓаат. Ама не да се анатемизира целиот концепт на политички натпревар. Ова вака значи дека утре и да се појави стварно чиста партија со стварно способни луѓе, овој цинизам брзо ќе ја осакати и евентуално убие. Затоа што и таа нова партија ќе биде анатемисана и осакатена и изгазена и оцрнета ако не дај боже нешто "искористи" од некакво незадоволство или протест. И после тука треба да се случуваат некакви промени?

Па дали сте вие нормални?

Евидентно не. Од авион се гледа дека не. Ние сме просто разведени од нормалното и разумното и ефикасното по скоро сите основи.

Да заклучам.

Македонскиот народ е успешно кастриран од секаква способност ефикасно да се организира, зашто го убедија дека треба да биде морално и општествено перфектен, и политички неутрален пред да започне било што.

И народот си мисли дека стварно така треба и почна предвремено да се извинува и да си мава камшици по грбот да ја докаже неговата чистост пред Владетелот.

(„Ама ние стварно не сме од невладини или партии или тајни организации ама стварно верувајте ни се извинуваме однапред за сите погрешни звуци од нашите протести леле многу сме грешни се покајуваме предвреме за секоја непријатност ама ама.“)

Како да треба да си вреден, и да заслужиш за да протестираш?

Како да треба да положиш и државен тест за подобност за да протестираш?

Бог да чува и да брани!

...

Глупи сме. Трагично сме глупи. Поради тоа сме и неспособни. Од секое дрвце не бидува свирче.

Вечна ни памја.

Карикатури: Pavel Constantin