Околу идејата за поставување блокатори за мобилни телефони и за други електронски уреди, директорката на ДИЦ рече дека оваа година таа нема да може да се реализира, но дека како опција останува за во иднина
Државната матура ќе се полага во средните училишта само ако тие ги исполнуваат потребните стандарди за спроведување на испитите. За оние училишта што не ги исполнуваат просторните услови од Државниот испитен центар (ДИЦ) ќе им бидат овозможени алтернативни простории врз основа на барањата што ќе ги достават, рече директорката на ДИЦ, Даниела Јовчевска-Михајловска, по денешната средба со Сојузот на средношколци.
„Сите училишта кои ги исполнуваат просторните можности, согласно Правилникот за организирање државна матура, што значи метар и половина растојание пред и зад ученикот и од страна, имаат можност да полагаат во големите простории коишто ги имаат во училиштата, а тоа се фискултурните сали или холовите. За останатите училишта, коишто немаат такви можности или не ги исполнуваат просторните услови, државната матура ќе се организира на други локации, поточно на факултетите“,
рече Јовчевска-Михајловска.
Таа додаде дека побарале од директорите, односно од училишните матурски одбори, да ги анализираат просторните услови и да достават до ДИЦ барање доколку не се во можност во своите училишта да организираат матура според Правилникот.
За оние училишта што веќе се изјасниле дека немаат услови, директорката вели дека ДИЦ пристапил кон барање решенија за организирање на матурата на факултетите.
Според неа, такви училишта има повеќе во државата, но за разлика од минатите години кога за полагање на матурата во спортски сали на други училишта, тие самите обезбедувале и дотаму превезувале клупи и столчиња, оваа година ќе им бидат обезбедени услови на факултетите, каде што сè ќе им биде наместено.
Околу идејата за поставување блокатори за мобилни телефони и за други електронски уреди, директорката на ДИЦ рече дека оваа година таа нема да може да се реализира, но дека како опција останува за во иднина.
Лидерот на средношколците Берин Мухамед изјави дека полагањето во амфитеатрите на факултетите ќе важи за сите училишта што немаат просторни услови, а не само од некои градови бидејќи, рече, се шират такви нејаснотии меѓу средношколците.
„Затоа сакаме да ги информираме подобро средношколците. Побаравме средба со МОН и ДИЦ и по состанокот дознавме дека на сите училишта им се дава можноста да полагаат во нивните простории ако ги исполнуваат условите за полагање, а за оние кои не можат да ги исполнат условите, може од ДИЦ да побараат простори“,
рече Мухамед.
Двата екстерни испити од државната матура 2024/2025 година ќе се полагаат на 31 мај и 11 јуни. За полагање се пријавени околу 15 000 матуранти.
Овој месец матурантите ја работат проектната задача која, заедно со екстерните и интерните испити, е дел од државната матура. ДИЦ веќе ги почнал подготовките за завршниот испит – објавени се тестови од минатите години заедно со точните одговори, што им помага на матурантите како подготвителен материјал.
Со донесувањето на новиот Закон за средно образование, кој е во собраниска процедура, се очекуваат и новини во полагањето на државна матура, односно модели согласно видот на образование (гимназиско, стручно и уметничко).