Американскиот претседател Доналд Трамп изјави дека фундаментално верува дека рускиот претседател Владимир Путин „ќе ја направи вистинската работа“ во преговорите за мировен договор во руско-украинската војна.
Говорејќи пред новинарите на „Ер Форс 1“, Трамп рече: „Мислам дека нема да го прекрши зборот. Зборуваме за Путин. Мислам дека нема да го прекрши зборот. Го познавам долго време. Секогаш добро се сложувавме“.
„Сигурно не би сакал да воведам нови царини за Русија, но доколку се воведат, тоа не би било добро за нив“, рече тој.
Зборовите на Трамп претставуваат омекнување на тонот од изјавите што тој ги даде претходно во неделата.
Претходно тој ден, во интервју со Кристен Велкер од Ен-Би-Си, Трамп рече дека е „бесен“ и директно го критикуваше Путин: „Ако Русија и јас не успееме да постигнеме договор за запирање на крвопролевањето во Украина и ако утврдам дека Русија е виновна за тоа – а можеби и не е – но ако утврдам дека е така, ќе ставам дополнителни царини за целата руска нафта“.
Во тоа интервју, Трамп изрази незадоволство од критиките на Путин кон украинскиот претседател Володимир Зеленски, кого Путин очигледно не сака да го види на власт.
„Некои од работите што ги кажа во последните ден или два… за Зеленски… затоа што ако мисли дека не е доверлив, и мора да склучите договор со него – без разлика дали ви се допаѓа или не – тогаш тоа не е добро. Не бев задоволен со тоа. Но, мислам дека тој ќе биде добар“, им рече Трамп на новинарите.
Трамп го критикуваше и Зеленски: „Гледам дека се обидува да се повлече од договорот“
Трамп во последните месеци често јавно го изразуваше своето незадоволство од Зеленски, а во неделата вечерта додаде уште една критика, велејќи дека украинскиот претседател можеби се обидува да се повлече од договорот за минерали за кој администрацијата на Трамп претходно преговараше со него. Според договорот, Украина ќе добие американска помош во замена за отстапки за експлоатација на ретки минерали.
Тој договор требаше да биде потпишан во февруари, денот кога Трамп и потпретседателот Џеј Ди Венс се судрија со Зеленски во Белата куќа.
„Гледам како се обидува да се повлече од договорот за ретките земји“, рече Трамп. „И ако го направи, ќе има проблеми. Големи, големи проблеми. Имавме договор за ретките земји, а сега тој вели: „Па, знаете, можеби ќе сакам повторно да преговарам за тој договор.“
За време на кампањата, Трамп постојано тврдеше дека ќе ја заврши војната во Украина на првиот ден од неговиот мандат. Но, сега тој вели дека не поставил конкретен рок за Путин.
„Тоа е психолошки рок, ако мислам дека не развлекуваат, нема да бидам задоволен“, заклучи тој.