• Мартин Танасковски
Погледот на табелата во Премиер лигата покажува дека Арсенал останува единствениот тим способен да му направи проблеми на Ливерпул на патот до шампионската титула. Сепак, 2 февруари, поточно недела, е денот кога би можел да се расчисти патот на Ливерпул да стане нов шампион на Англија, бидејќи од 17 часот и 30 минути на „Емирати“ се игра големото дерби помеѓу Арсенал и Манчестер Сити.
Во 2025 година, Граѓаните прилично се опоравија од неволјите и сериските неуспеси што ги претрпеа од крајот на октомври до крајот на декември, но казнената експедиција на која се навикнавме во последните години сè уште не доаѓа во Северен Лондон.
Сити се уште има брутална моќ во играчкиот кадар, но „топчиите“ се ослободија од комплексите и не им дозволија на момците на Гвардиола да ги победат во четири последователни натпревари во сите натпреварувања. Последен пат кога Сити дојде на „Емирати“ беше поразен од Габриел Мартинели со гол во 86. минута, а да потсетиме и дека на стартот од сезоната секунди го делеа Арсенал од освојување на „Етихад“.
Тимот на Артета не успеа, најблаго речено, на полесните тестови оваа сезона, дозволувајќи им на тимовите од дното на табелата да грабнат бодови во неколку наврати, но во однос на судирите со ривалите од големата шесторка, Арсенал е неспоредлив тим во последните две години. „Топчиите“ се непоразени на 16 последователни натпревари во таа категорија, серија која трае над 600 дена! И не е доволно само да се продолжи, бидејќи на Арсенал не му одговара реми.
