Производителот на челични производи Макстил објави дека минатата 2024 година остварил приходи од продажба од 135 милиони евра, што е речиси исто ниво како и претходната 2023 година.
Неревидираните и неконсолидирани финансиски извештаи на компанијата објавени на Македонската берза покажуваат дека речиси 92% од приходите од продажба се остварени од извоз, односно од продажба на странски пазари. Вредноста на извозот на Макстил во 2024 година бележи раст од 3% и изнесувал 124,3 милиони евра.
Приходите од продажба на домашниот пазар, пак, изнесувале близу 11 милиони евра и бележат пад од 22% во споредба со 2023 година.
Од објавените извештаи може да се види дека оперативните расходи на Макстил во 2024 година се зголемени за 2%.
Нето добивката по оданочување на Макстил лани изнесувала близу 4 милиони евра и е намаленна за 32% во споредба со претходната година. “Намалувањето на добивката во голема мера се должи на зголемените трошоци на производство поради повисоките цени на суровините и материјалите во текот на 2024 година, зголемената амортизација поради зголемениот износ на инвестиции остварен во последните години”, информираат од компанијата.
Американските царини носат неизвесност за еропската челична индустрија
Од Макстил, кој според последата едиција Топ 100 Извозници, е 10-ти најголем извозникк од Македонија, велат дека минатата 2024 година била тешка година за глобалната побарувачка за челик, главно како резултат на растечката глобална несигурност, повисоките каматни стапки и севкупната слабост во производството.
“Како што започнува 2025 година, постои одредена неизвесност поради очекувањата за промена во глобалната политика по бројните избори ширум светот. Новите политики би можеле да доведат до нови траектории на инфлацијата, трошоци за камати, како и трговски текови, текови на капитал и трошоци за производство. Со неодамнешните промени во политиката во САД, повторно се појави загриженост за потенцијалните нови царини за увоз на челик, што се очекува значително да влијае како на американската, така и на европската челична индустрија”, велат од Макстил.
