Астронаутите непланирано „заглавени“ на Меѓународната вселенска станица (МВС) открија дека речиси биле изгубени во вселената денот кога нивниот вселенски брод „Боинг Старлајнер“ се распаднал. Сунита Вилијамс (59) и Бери Вилмор (62) во јуни минатата година официјално требаше да патуваат на осум дена, што подоцна беше продолжено на 286 дена поради дефект.
Тие рекоа дека нивното вселенско летало имало проблеми од самиот почеток, вклучително и тесно избегната катастрофа кога првпат се приближиле до МВС, пишува „Дејли Мејл“. Вилмор мораше да преземе мануелна контрола бидејќи изгубиле четири погони, а со тоа и способноста безбедно да управуваат со „Старлајнер“. Тие разбрале дека можеби целосно ја изгубиле контролата над вселенското летало, додека прописите им наложиле да се вратат на Земјата, иако биле исклучително блиску до МВС.
– Во тој момент не знаев дали можеме да се вратиме на Земјата. Всушност, мислев дека веројатно не можеме. Не знаевме точно што се случува, зошто откажуваат погоните и кое е решението – изјави Вилмор.
Вилијамс додаде дека во тој момент имале „многу неискажана комуникација“ внатре во капсулата. Тие морале да одлучат што е поризично – обидот да се вратат на Земјата или да одат на МВС. Тие ја визуелизирале орбиталната механика и сфатиле дека се наоѓаат под вселенската станица, што всушност би ги натерало побрзо да се оддалечат од неа.
– Сето ова го правам во мојот ум. Не знам каква контрола имам. Што ако изгубам друг погон? Што ако ја изгубиме комуникацијата? Што ќе правам? Мислам дека и двајцата бевме малку нервозни тогаш бидејќи системот автоматски ќе не отфрли“, рече Вилмор, објаснувајќи дека „Старлајнер“ има систем кој ја користи вселенската станица како референтна рамка.
НАСА успеа да ги рестартира погоните, откако Вилмор се откажа од контролата на капсулата, оставајќи се себеси и Вилијамс да лебдат во вселената. Тој нагласува дека не му било лесно да го направи тоа. Кога погоните се вратиле, почувствувале огромно чувство на олеснување.
– Го направив мојот „среќен танц“. Прво, се разбира, затоа што сакам да бидам во вселената и среќен сум што сум на вселенска станица со одлични пријатели. Второ, бев навистина среќен што „Старлајнер“ се спои со вселенската станица. Мислев дека треба да земеме здив и да се обидеме да разбереме што се случи – изјави Вилијамс.
Тогаш тие исто така сфатиле дека ќе им треба друг начин да се вратат на Земјата, бидејќи нема да можат да се вратат со ова вселенско летало, велат тие, пренесува „Дејли Мејл“.