Во следните неколку дена сите канцеларии на американската агенција за странска помош (УСАИД) ќе бидат затворени, а локалните работници кои работеле за УСАИД ќе бидат отпуштени, тврди „Ројтерс“, повикувајќи се на повеќе извори во агенцијата.
Досега отпуштаа работници на УСАИД кои работеа во Америка, а сега истото ги чека и локалните работници во сите земји каде што се отворени канцелариите на агенцијата.
Некои од работниците од САД кои не беа отпуштени се префрлени во Стејт департментот, како што соопшти државниот секретар Марко Рубио.
Да потсетиме, УСАИД е една од најголемите „мети“ на американскиот претседател Доналд Трамп и неговиот тим, особено милијардерот Илон Маск, кој најактивно се залагаше за гасење на оваа агенција.
УСАИД постои од ноември 1961 година, кога Конгресот на САД ја одобри извршната наредба на американскиот претседател Џон Ф. Кенеди од истата година.
Веднаш по неговото пристигнување во Белата куќа, Трамп го суспендираше финансирањето на УСАИД, а потоа започна откажувањето на договорите, како и пропаѓањето на агенцијата, чии останки ќе бидат споени во Стејт департментот.
Севкупно, УСАИД вработува 7.176 луѓе надвор од Америка и се очекува сите овие работници да бидат отпуштени.