Утре во Луксембург треба да се одржи состанокот на Советот за надворешни работи на ЕУ, на кој ќе се разговара за Западен Балкан.
На состанокот на министрите за надворешни работи на земјите-членки на ЕУ, со кој претседава високата претставничка на ЕУ за надворешна политика и безбедност, Каја Калас, теми ќе бидат и војната на Русија во Украина, ситуацијата на Блискиот Исток, вклучувајќи ги најновите случувања во Сирија, односите на ЕУ со Африка и други актуелни прашања, со фокус на односите меѓу Ерменија и Азербејџан.
Западен Балкан ќе биде на дневен ред за време на работниот ручек на министрите на ЕУ, на кој, како што соопшти Советот на ЕУ, ќе разменат мислења за односите на ЕУ со регионалните партнери, со фокус на тоа како дополнително да се унапреди безбедносната и одбранбената соработка во справувањето со политичките предизвици и промовирањето на регионалната стабилност и безбедност.
Каја Калас ќе ги информира министрите на ЕУ за последните случувања во дијалогот меѓу Белград и Приштина, како и за нејзините неодамнешни посети на Црна Гора, Албанија и Босна и Херцеговина.
Понатамошната дискусија се очекува да се фокусира на различни аспекти на односите, особено во однос на регионалната стабилност и безбедност, случувањата во Босна и Херцеговина и Србија и соработката со клучните актери во регионот.
Во пресрет на состанокот на Советот за надворешни работи на ЕУ, Калас вечерва ќе приреди неформална вечера за министрите за надворешни работи на Западен Балкан, на која се очекува дискусиите да се фокусираат на безбедносните и одбранбените прашања.
На вечерата ќе учествува и шефот на српската дипломатија Марко Ѓуриќ.
По состанокот на Советот за надворешни работи на ЕУ, се очекува да се одржи првиот дијалог на високо ниво меѓу ЕУ и палестинските власти.
