Деновите и неделите минуваат, но болката и тагата од трагедијата никако не стивнуваат. Празнината што остана по заминувањето на 59 млади животи, меѓу кои и осум познати македонски естрадни уметници е ненадоместлива. И секогаш ќе биде…
Но, освен поуките кои мораме да ги извлечеме од катастрофата за ваква трагедија никогаш да не ни се повтори, сепак животот вака или онака, мора да оди понатака. Иако се’ е уште многу црно и тажно, шоуто сепак ќе мора да продолжи… Она естрадното, иако повеќе од сигурно дека се’ уште никому не му е до забава, до песна, смеа, веселба… Ниту на естрадните уметници, ниту пак на публиката. Но, сепак… колку и да изгледа дека сега да се свири и пее е нестварно, овој пат шоуто ќе продолжи со посебна цел и причина – хуманитарно!
Први кои собраа храброст, но и решија да покажат естрадна хуманост и се осмелија да застанат на сцената, се македонските поп ѕвезди Тамара Тодевска и Антониа Гиговска.
Со цел за поддршка и помош на семејствата на починатите и повредените во трагедијата во Кочани, Тамара Тодевска реши да организира хуманитарен солистички концерт.
Музички настан кој ќе се одржи на 17. април (четврток), од 20:00 часот, во Младинскиот културен центар (МКЦ) во Скопје. Средствата од продажбата на билетите ќе бидат наменети за семејствата на починатите граѓани, како и за сите повредени во трагедијата.
Информациите за продажбата на влезниците ќе бидат објавени претстојните денови на офијалните канали на социјалните мрежи на Тамара, која ги повика своите фанови и сите останати да бидат дел од овој хуманитарен концерт:
„Хуманоста и солидарноста се вредностите кои можат да ја вратат надежта, а се толку потребни за семејствата на починатите и повредените граѓани во трагедијата во Кочани. Во моментите на тага и жалост – да останеме луѓе, да пееме македонска музика, да пееме за Кочани. На 17. април (четврток), во @mkc_skopje, од 20:00 Ве повикувам на хуманитарен концерт за Кочани“ – сподели пејачката на своите профили на социјалните мрежи.
View this post on Instagram
Антониа Гиговска пак, исто така јавно се обрати на својот Инстаграм. И тоа со говорна порака во која и самата ја искажа својата неминлива болка за загубата на младите животи и на своите колеги од ДНК и бендот, но и со објава дека токму затоа решила веќе следниот викенд да застане на сцената и двата настапи да и бидат хуманитарни, а својот хонорар да го донира за настраданите преку платформата „Support Kocani“.
При тоа пејачката додаде дека и двата клуба каде ќе настапува – на 04.04 во клубот „Енигма“ – Куманово, па следната вечер, на 05.04 во кабаре „Клик“ во Штип исто така ќе учествуваат со свои средства во оваа акција, но и во самите клубови за време на настапот ќе има кутии за донации во која ќе можат и присутната публика исто така да донира.
„Не се милиони, но се од срце… Верувам дека ќе ги поттикнам и моите колеги даго направат истото, за да помогнеме онаму каде што е најпотребно“ – споделила меѓудругото Антониа во својата видео објава.
View this post on Instagram
Фото и видео: Инстаграм/tamaratodevska/antoniagigovskaa/
