Европол објави дека иследниците од повеќе од 30 земји успеале да разоткријат огромна педофилска мрежа на „даркнет“, во која имало дури 1,8 милиони корисници ширум светот. Платформата наречена „Кидфликс“, која била под истрага од 2022 година, сега е затворена, а 79 лица се приведени како дел од голема операција.
Истрагата вклучува илјадници осомничени, додека десетици илјади парчиња материјал за злоупотреба на деца се запленети. Според информациите на германската агенција dpa, акцијата ја водела баварското криминално биро, а претреси биле извршени во 31 земја.
Идентификувани се околу 1.400 осомничени ширум светот. 79-те уапсени не се осомничени само за гледање или преземање видеа од сексуална злоупотреба на деца. Некои од нив се осомничени и за активна злоупотреба, пишува RND.
Платформата содржела повеќе од 91.000 видеа за експлицитна злоупотреба на деца, а во просек се објавувале три и пол нови видеа на секој час. Пристапот до мрежата бил возможен по регистрацијата и плаќањето со криптовалути.
Меѓународната акција беше координирана од Европол.