Грција се соочува со екстремни временски непогоди – силни бури, обилни дождови и разорни ветрови веќе зафатија делови од земјата, а метеоролозите предупредуваат дека најлошото допрва доаѓа.
Циклонот што се движи над Балканот носи невреме кое од Егејското Море ќе се премести кон копнените делови на Грција, предизвикувајќи интензивни поројни дождови, грмежи и силни ветрови. Се очекува на многу локации да наврне повеќе дожд отколку вообичаено за целиот месец.
Најкритична ситуација се предвидува во Егејското Море, на егејските острови, на Халкидики, како и во северните и североисточните делови на Грција.
Стручњаците предупредуваат дека локално може да паднат и повеќе од 200 литри дожд по квадратен метар, што би можело да предизвика разорни поплави и надојдени води.
Циклонот продолжува кон југоисток – кои земји се следни на удар?
Невремето што веќе ја погоди Грција е резултат на силен циклон над јужниот Балкан, кој моментално се движи кон југоисток. Овој ист циклон во претходните денови донесе обилни врнежи и во Македонија, а силни врнежи и поплави во Србија и БиХ, предизвикувајќи сериозни проблеми во регионот.
Според најновите прогнози, врнежите од Грција во текот на ноќта и утрешниот ден ќе се прошират и кон Бугарија и Македонија, но според метеролозите, нашата земја не би требало да се соочи со истото сценарио како Грција.
Студен бран и снег на Балканот?
Екстремно лошото време во Грција ќе трае до крајот на неделата, носејќи обилни дождови, пониски температури и силни бури.
На повисоките планини во северна и северозападна Грција, како и во Македонија, Бугарија и јужните делови на Србија, се очекува и снег на надморска височина од 1500-2000 метри.
Извор: politika.com.mk