Во текот на вчерашниот ден Apple ја пушти една од поважните надградби на iOS 18 со која го заокружи пуштањето на повеќето Apple Intelligence функции. Со iOS 18.2, како и другите системи, корисниците ги добиваат Image Playground и Genmoji, а тука е и интеграцијата на ChatGPT во Siri.
Во најавата на надградбата, Apple истакна кога може да се очекува последната поголема новина поврзана со вештачката интелигенција, а тоа е конечното унапредување на Siri во паметниот асистент кој требаше да биде уште од почетокот.
Оваа новина ќе дојде со iOS 18.4, а истата може да се очекува во април идната година.
Со надградбата Siri треба да ја добие способноста да го разбере личниот контекст на корисникот, како и да добие пристап, односно „свесност“ за работите кои се прикажани на екранот во моментот, од апликациите на Apple, но и другите.
Siri исто така треба да стане доста поспособна при разговорите, а вистинскиот напредок на овој план се очекува подоцна со најавите дека Apple наводно работи на сопствен голем јазичен модел кој ќе ја направи Siri способна како ChatGPT.
