Во текот на изминатата 2024 година од Македонија биле извезени близу 126 илјади тони свеж зеленчук во вредност од 87,5 милиони евра. Остварените приходи од продажба на зеленчук во странство лани забележале пад од 8% во споредба со 2023 година, додека извезените количини биле помали за 3,2%.
Увозот на зеленчук, пак, лани достигнал 36,3 милиони евра, со годишен раст од 17%. Лани во земјава биле увезени 53 илјади тони свеж зеленчук, што е за 16% повеќе отколку во изминатата 2023 година.
Ако се анализира извозот на свеж зеленчук, намалување и во вредност и во количина е забележано кај речиси сите поголеми групи, како што се доматите, зелката, пиперките, компирот, печурките и замрзнатиот зеленчук. Сепак, раст е забележан кај извозот на краставици и корнишони.
Најголем извозен приход лани е остварен од продажбата на зелка – 29,6 милиони евра, што претставува намалување од 1,3% во споредба со претходната година. Следи извозот на пиперки, кој минатата година изнесувал 18,9 милиони евра, што е пад од 8,7% во споредба со претходната година. Извозот на домати лани достигнал речиси 12 милиони евра, со годишно намалување од 2,4%.
Извозот на краставици и корнишони минатата година изнесувал 4,5 милиони евра и е зголемен за 15,2% на годишно ниво.
.
Извозот на замрзнат зеленчук минатата година изнесувал 7,8 милиони евра, со годишен пад од близу 20%. Споредено со пред 10 години, извозот на зеленчук од Македонија вредносно е зголемен за 33%, но во обем е намален за 11%.
Од друга страна, увозот бележи постојан раст во изминатите 10 години и е поголем за цели 178% во споредба со 2015 година, додека увезените количини за истиот период се зголемиле повеќе од двојно.
На кои пазари најмногу се продавал македонскиот зеленчук?
Анализата на податоците од Државниот завод за статистика покажува дека македонскиот свеж зеленчук минатата година се извезувал во 38 земји ширум светот. На 17 пазари е остварен извоз со вредност поголема од 1 милион евра. Сепак, земјите од регионот продолжуваат да бидат најголемиот пазар.
Најмногу зеленчук минатата година е продаден во Србија – 19,5 илјади тони во вредност од 14,5 милиони евра. Следува Полска со извоз вреден 10,2 милиони евра, Хрватска со извоз од 9,4 милиони евра, Украина со 8,5 милиони евра, Италија со 6,8 милиони евра, Германија со 5,6 милиони евра, Бугарија со 5,3 милиони евра, и Романија со извоз од 4,1 милион евра. Зеленчук лани се извезувал и во Русија, во вредност од 3,1 милион евра. Косово, со извоз вреден 2,7 милиони евра, беше десеттиот најголем извозен пазар за македонскиот зеленчук.
