• Иван Димовски
Ракометарите на Охрид се радуваа на гостувањето кај Бутел во Скопје 20-22 (8-13) во првото коло од плеј-офот во Суперлигата. „Гладијаторите“ одиграа одличен натпревар и сигурно водеа, меѓутоа во завршницата дозволија домашниот тим да се врати резултатски, но не и да дојде до позитивен резултат.
- Комплетниот натпревар меѓу Бутел Скопје и Охрид:
Стартот му припадна на Бутел кој поведе со 2-1, по што следуваа четири врзани гола на охриѓани за 2-5. Во продолжението Охрид диктираше темпо, беше подобар и стигна до максималната предност во првиот дел од 7-13, а потоа Бутел даде уште еден гол до паузата (8-13).
Во продолжението момците на Алушовски влегоа подобро и стигнаа до највисоки седум разлика. Тогаш Кузманоски успеа да го консолидира својот тим, па од 12-19 врза серија од 4-0 за преполовување на негативата. Бутелчани заиграа доста посигурно, ја стегнаа одбраната и беа подобри во нападите.
Тоа ги доведе домашните и на минус еден со голот на Димитар Узунчев на влезот во последната минута (20-21). Охрид одигра според планот, долг напад за да го потроши времето, Алушовски искусно свика и тајм-аут. Судиите Металари и Николовски на петнаесет секунди до крајот гледаа снимка и му дадоа црвен картон на Теодор Тодески, а Цирар реализира пенал за победа.
Токму словенечкото крило со седум реализации беше најдобар на паркетот, а му помогна Ловро Јотиќ со шест. Кај Бутел со по четири гола се истакнаа Милошески и Ѓеоргиевски.
