Израел ги деградираше борбените способности на своите главни противници во текот на изминатата година, вклучувајќи го либанскиот Хезболах и палестинската Хамас, која од од САД и ЕУ е прогласена за терористичка организација.
Но, јеменските бунтовници Хути, кои продолжуваат да гаѓаат проектили и беспилотни летала кон Израел, се покажаа како отпорен непријател и покрај израелските напади.
„Одвраќањето на Хутите претставува значителен предизвик. Израел нема доволно разузнавачки информации за групата и нејзините оперативни способности“, рече Ахмед Наги, јеменски аналитичар за Меѓународната кризна група со седиште во Брисел.
Успехот на Израел зависи од неговата способност да ги лоцира и уништи објектите за оружје на групата поддржана од Иран, задача што „досега се покажа тешка“, вели Наги.
Друг предизвик е географијата.
Јемен се наоѓа на околу 2000 километри од Израел. Хутите исто така контролираат големи делови од земјата, вклучувајќи го и нивното упориште во планинскиот северозапад и крајбрежјето на Црвеното Море.
Израел ги интензивираше своите воздушни напади во последните недели против Хутите и покрај тоа што вооружената група претставува ограничена директна воена закана за Израел. Засилените израелски напади се закана да ја влошат хуманитарната криза во Јемен.
Ескалација на напади
На 26 декември, Израел соопшти дека извршил воздушни напади врз главниот аеродром во Сана, како и електраните и „воената инфраструктура“ на неколку јеменски пристаништа.
Шефот на Светската здравствена организација „за влакно“ ја избегна смртта во израелските напади на аеродромот во кои загинаа најмалку шест лица.
Сојузниците на Израел, вклучително и Соединетите Држави и Велика Британија, исто така извршија напади во Јемен.
Војската на САД соопшти дека извршила воздушни напади врз цели на Хутите во Сана и долж јеменскиот брег на 30 и 31 декември, вклучително и „команден и контролен објект и напредни капацитети за производство и складирање на конвенционално оружје“.
Хутите пукаа врз американските поморски сили и го нападнаа меѓународниот брод во Црвеното Море, прекинувајќи ја клучната глобална трговска рута.
Израелските напади дојдоа во време на речиси секојдневни ракетни и беспилотни напади на Хутите врз Израел. Повеќето од нападите беа пресретнати од израелската противвоздушна одбрана и предизвикаа мала материјална штета. Но, тие активираа постојани сирени за воздушен напад во многу делови на Израел и го нарушија секојдневниот живот.
Хутите ги започнаа своите напади врз Израел и меѓународните бродови кон крајот на 2023 година.
Тоа се случи набргу откако Израел ја започна својата разорна војна во Појасот Газа. Бунтовниците ветија дека ќе продолжат со нападите, додека не се постигне прекин на огнот во палестинската енклава.
Фарзан Сабет, виш научен соработник на Институтот во Женева, вели дека Израел во голема мера дејствува против Хутите. Израелските напади, рече тој, главно се насочени кон „цивилна и стратешка инфраструктура, а не врз воени средства“.
Цивилите го понесоа товарот на насилството во Јемен, каде на две третини од населението од околу 35 милиони луѓе им е потребна хуманитарна помош.
„Ние, луѓето, плаќаме за тоа, а не Хутите“, рече Мустафа Номан, поранешен заменик-министер за надворешни работи на Јемен.
Доверливите сојузници на Иран
Хутите се дел од таканаречената иранска „Оска на отпор“, нејзината лабава мрежа на милитантни групи против главниот непријател Израел.
Израел сериозно ја ослабна „Оската на отпор“ во текот на изминатата година.
Копнената инвазија на Израел и разорната воздушна кампања во Либан ги десеткуваа воените капацитети на Хезболах, вооружена група и политичка партија во Либан.
Тековната израелска војна во Појасот Газа ја опустоши палестинската територија и ја намали борбената моќ на Хамас.
Во меѓувреме, на почетокот на декември, долгогодишниот сириски претседател Башар ал Асад, уште еден член на Оската на отпор и клучен сојузник на Иран, беше соборен од власт од страна на исламистичките бунтовници.
Тоа ја зголеми важноста на Хутите за Иран. Бунтовниците се вооружени со високо способни балистички ракети и се најмалку погодени од израелските напади.
„Без Хутите, Израел веројатно ќе го пренасочи својот целосен фокус кон директно таргетирање и слабеење на Иран“, заклучува Наги.
