Разговаравме со д-р Глигорова за бронхитис кај педијатарската популација, причини, манифестации и негови компликации
Најчеста причина за настанување на бронхитисот кај децата се вирусните инфекции на горните дишни патишта особено во есенскиот и зимскиот период, со температура не повисока од 38°С и времетраење до три дена.
Кои се најчести фактори за бронхитис кај детската популација?
Најчеста причина за настанување на бронхитисот кај децата се вирусните инфекции на горните дишни патишта особено во зимскиот период. Тие вообичаено се манифестираат како настинки, но се комплицираат и предизвикуваат воспаление на слузницата на бронхиите. Причина можат да бидат и бактериски инфекции со стрептококи, Haemophilus influenza, Mycoplasma pneumoniae, Chlamidia pneumoniae и др. кои што од горните дишни патишта се спуштаат према бронхијалното стебло. Поретко причина можат да бидат и алергиски реакции. Ослабениот имунолошки систем и лошите диететски навики се само фактор плус во настанувањето на бронхитисот. Најкритичен период е од есента до пролетта, т. е студеното и влажно време.
Кои се вообичаените симптоми на бронхитис кај децата?
Основни промени кои настануваат се зголемена секреција и едем во бронхиите, а понекогаш и бронхоспазам. Како резултат на тоа како основен знак се јавува кашлицата. Во почетокот е сува и непродуктивна, а подоцна станува продуктивна, со искашлување на мукоидна, слузеста содржина. Ова е проследено со: течење на носот, конјуктивитис, болки во грлото, засипнатост, општа слабост, треска, главоболка, потење, болки во мускулите и зглобовите.
Дали симптомите на бронхитис може да се помешаат со оние на пневмонија?
Симптомите на овие две болести се многу слични. Но, разлики сепак постојат. Симптомите на бронхитис се: температура не повеќе од 38°С која трае до три дена, воглавно со сува кашлица, без болка во градите и губење на здивот, општа слабост која не е толку изразена. Кај пневмонијата има повисока температура од 38°С со времетраење повеќе од три дена, влажна кашлица која предизвикува болка и недостаток на здив, силно изразена општа слабост и цијаноза (сина кожа). Исто така, пациентот се жали на недостаток на апетит, несоница и општа интоксикација на телото.
Какви типови на бронхитис може да се развијат кај децата?
Најчест е акутниот бронхитис предизвикан од вирусни инфекции и кашлицата е главната карактеристика на болеста. Ширењето на болеста е брзо, преку капки или нечисти раце. Вообичаено трае околу две недели, кај некои деца и три недели, со прогресивно слаба кашлица. Акутниот бронхитис најчесто се јавува преку зимата, после настинка или некоја вирусна инфекција на грлото или носот. Може да прерасне во акутен опструктивен бронхитис е кој претставува грчење на периферни дишни патишта, (бронхијална опструкција). Се јавува поради едем на слузокожата на бронхиите на тој начин што се акумулира слуз на ѕидовите на бронхиите која тешко се искашлува. Детето дише брзо, со краток здив, со „свирење“ на градите, а издишувањето станува подолго. Кашлицата прво е сува, а потоа станува продуктивна.
Децата пациенти со цистична фиброза и вродени аномалии на дишните патишта се ризична група за појава на хроничен бронхитис кој трае три или повеќе месеци годишно.
Како да се превенира развојот на хроничен бронхитис?
Се препорачува избегнување на ризик факторите за појава на хроничен бронхитис како што е изложување на респираторната слузокожа на хронични иританси, пред се чадот од цигари или загадениот воздух. Правилното и навремено третирање на акутниот бронхитис е битно за да нема повторувачки епизоди кои би преминале во хроничен случај. Но, можеби најважно од се е зајакнувањето на одбраната на телото со внесување на здрава храна, доволно течности и баланс меѓу физичката активност и одморот на организмот.
