Технолошкиот гигант „SAP“ ја освои титулата највредна јавно тргувана компанија во Европа, поместувајќи го данскиот производител на лекови за слабеење „Novo Nordisk“, пишува „Bloomberg“.
Акциите на „SAP“, кои уживаа во растечкиот оптимизам на инвеститорите за софтверот базиран на облак, пораснаа за 1,6% во понеделникот, вреднувајќи ја германската компанија на околу 314 милијарди евра. Ова го става пред „Novo Nordisk“ по вредност, чии акции паднаа за 16% оваа година бидејќи испитувањата на следната генерација на лекот за слабеење на компанијата, „CagriSema“, беа разочарувачки.
Цената на акцијата на „SAP“ порасна за 42% во изминатата година, поттикната од забрзаното преминување на клиентите од традиционалните физички сервери на облак ИТ инфраструктурата. Овој процес и овозможи на компанијата да продава попрофитабилни производи во комбинација со карактеристики на вештачка интелигенција, поттикнувајќи раст на приходите.
Просечната проценка на аналитичарите е дека продажбата на „SAP“ ќе се зголеми за 12% оваа година. Доколку ова се постигне, компанијата ќе ја забележи најбрзата годишна стапка на раст во последната деценија. Оперативната добивка се очекува дополнително да се зголеми по објавувањето во јануари 2024-та година на програмата за реструктуирање.
Постојаната нагорна траекторија на „SAP“ е во контраст со онаа на другите европски компании со сини чипови, кои се соочуваат со предизвици. „ASML Holding“ се бори поради слабите нарачки од некои од нејзините клучни клиенти, како и поради заострувањето на ограничувањата за извозот на опрема за чипови во Кина.
