Кривична пријава за градоначалникот на Ново Село – „Здрава Котлина“ обелодени тешки злоупотреби

Еколошкото здружение „Здрава Котлина“ од Струмица поднесе обемна и детална кривична пријава против актуелниот градоначалник на Општина Ново Село, Ѓорѓе Божинов. Пријавата, која содржи 125 страници техничка и правна документација, обвинува за сериозни прекршувања на законот, загрозување на животната средина, прикривање на информации и репресија врз граѓани.

„Здрава Котлина“ ја најави оваа постапка уште при првите граѓански протести и во услови на растечка репресија врз локалното население, активисти и вработени. Според здружението, поднесената пријава е одговор на „феудалното владеење“ на Божинов и неговото семејство врз општината, зад маската на административни процедури и заплашувања.

Пријавата е поднесена до низа институции, а нејзини клучни делови се:

• Јавно обвинителство (републичко, виши и основни)
• Сектор за економски криминал при МВР
• Финансиска полиција
• ДКСК
• Државен завод за ревизија

Обвиненијата опфаќаат 11 сериозни кривични дела, вклучувајќи:

• Злоупотреба на службена положба
• Фалсификување документи
• Перење пари
• Даночно затајување
• Судир на интереси
• Бесправно градење
• Злосторничко здружување

Доказите откриваат сериозни прекршувања од страна на градоначалникот Ѓорѓе Божинов и неговото опкружување. Најпрвин, општината издала спорна градежна дозвола за леарница за алуминиум, лажно класифицирана како „лесна индустрија“, иако всушност станува збор за тешка загадувачка дејност која може сериозно да го загрози квалитетот на изворската вода за Ново Село, реката Струмица и блиското село Самуилово.

Дополнително, во документацијата се откриени фалсификувани податоци, компјутерски интервенции и целосно нетранспарентно постапување, со што се прикривале информации од јавен интерес. Истовремено, регистрирани се и случаи на политичка и институционална репресија — преку притисоци врз вработени и активисти, мобинг, присилни преместувања, тужби и инспекциски контроли како средство за одмазда кон неистомисленици.

Особено загрижува конфликтот на интереси, каде општината склучувала договори со фирма во сопственост на таткото на градоначалникот, кој се сомничи дека учествувал во сомнителни финансиски трансакции пред издавањето на градежната дозвола. На сето тоа се надоврзува и обидот за целосна нетранспарентност — укинати се јавните преноси од седници, ограничен е јавниот увид во документите, а со тоа грубо се прекршени правата на граѓаните за информираност и учество во донесувањето одлуки.

Здрава Котлина“ најавува поднесување на нови кривични пријави во наредниот период, врз основа на дополнителни незаконски дејствија откриени при истражувањето.

Здружението бара:

• Вонредна државна ревизија на Општина Ново Село
• Заштита на граѓаните и вработените подложени на притисоци
• Расветлување на злоупотребите и запирање на сите активности поврзани со спорната индустрија

„Здрава Котлина“ ги повикува сите граѓани, особено вработените во општината, да не молчат пред притисоците и неправдите. Според здружението, документите се веќе обезбедени, и секоја дополнителна вмешаност ќе биде предмет на кривична одговорност.

„Феудалното однесување си има граници на толеранција. Време е за отпор – храброста е нашето најсилно оружје“, стои во заклучокот на соопштението.