Македонски
Библиотеките не може веќе да бидат место каде што само се изнајмуваат книги. Мора да се понудат различни содржини. Ние во Библиотеката „Другарче“ имаме и курс по англиски јазик, имаме и занимална, игрална за деца која е најстарата игротека во Македонија и која фунцкионира веќе 50 години, вели Снежана Стојчевска, директорка на ЈУ Градска библиотека „Браќа Миладиновци“.
ЈУ Градска библиотека „Браќа Миладиновци“ – Скопје е библиотечна мрежа, но и стожерна културна институција на главниот град. Годинава е големиот јубилеј – 80 години од основањето на ГБСК.
Основана е на 15 ноември 1945 година. Зградата на Библиотеката е прогласена за културно наследство на Македонија. Изградена е во 1973 година како нов дом на Библиотеката и е дело на архитектот Прохирија Хаџикостова- Пешиќ. Проектирана е наменски како библиотека и претставува една од најфункционалните во Македонија. Се состои од подрум, приземје и два ката. Зафаќа површина од околу 4.500 метриквадратни и има две депоа и книговезница во подрумот, сала за промоции и изложби на приземјето и голем број современи оддели и читални на катовите.
Стојчевска посочува дека имале курс по креативно пишување со Александар Русјаков, на кој на голема радост се пријавиле четириесеттина средношколци и основци и на крајот објавиле издание со нивните творби кое било промовирано на свечен начин.
Таа истакнува дека успехот на нивната работа се должи на вмрежувањето со издавачките куќи и со книжевните фестивали, бидејќи сметаат дека Библиотеката е второтo сигурно место за децата после домот и училиштето.
Издавачките куќи и книжевните фестивали донесоа странски автори, илустратори, се случија многу интересни работилници, учениците се пресреќни, има интерес и кај наставничките така што буквално имаме листа на чекање кое одделение, кој клас ќе биде следен на некоја следна работилница, а ги бираме според возраста и според книгите и навистина нудиме богата програма и различни содржини со цел да ги вратиме децата во Библиотеката, вели Стојчевска.
Подготвија:
новинар: Невена Поповска
фото/видео: Алесандар Ивановски
монтажа: Александар Арсовски
