Претставници на Белата куќа подготвија предлог за воведување царини од околу 20 отсто на повеќето увозни производи во САД, изјавија за „Вашингтон пос“т три лица запознаени со ова прашање. Доколку планот се имплементира, најверојатно ќе предизвика потреси на берзата и глобалната економија, наведува „Вашингтон пост“.
Постојаните царини, доколку стапат на сила овој квартал и предизвикаат силна одмазда од американските трговски партнери, се очекува речиси веднаш да ја втурнат економијата во рецесија која ќе трае повеќе од една година, со што стапката на невработеност ќе биде над 7 проценти, според Марк Занди, главен економист на Мудис, кој ги опиша резултатите како најлошо можно сценарио.
Советниците на Белата куќа предупредија дека неколку опции се на маса и дека се уште не е донесена конечна одлука. Белата куќа потврди дека царините ќе стапат на сила веднаш кога Трамп ќе ги објави. Прес секретарот на Белата куќа, Керолин Левит, објави дека тарифите ќе бидат објавени на церемонијата во Роуз Гарден во среда во 16 часот по европско време
Реципрочни или универзални царини Вчера вечерта Трамп постојано сугерираше дека царините ќе бидат „реципрочни“, во директна пропорција со оние што ги наметнуваат странските земји за американскиот извоз и посочи дека многу земји нема да бидат опфатени со нив. Ова веројатно би претставувало помалку драстична мерка од универзална царина.
Како што пишува „Вашингтон пост“, администрацијата на Трамп со недели интензивно ја планира утрешната објава за нови царини, кои тој ги нарече „Ден на ослободувањето“.
Претставниците на Белата куќа се потсмеваа на предупредувањата на економистите, тврдејќи дека слични песимистички прогнози биле погрешни кога Трамп воведе поскромни царини за време на неговиот прв мандат. Претставниците на администрацијата инсистираат на тоа дека царините се потребни за да се балансира глобалниот трговски систем кој со децении ги дискриминираше САД, претворајќи ги индустриските заедници низ целата земја во празни школки.
„Претседателот ќе објави тарифен план кој ќе стави крај на нефер трговските практики што ја ограбуваат оваа земја со децении. Тој тоа го прави во најдобар интерес на американскиот работник“, изјави вчера портпаролката на Белата куќа, Каролин Левит, за новинарите.
Зголемување на увозните давачки за производите од речиси целиот свет
Една опција би вклучувала зголемување на увозните царини за производи од речиси секоја земја, отфрлајќи ги поценетите пристапи јавно објавени од главните советници на Трамп во последните денови. Како правна основа, тој го цитира Законот за меѓународни економски овластувања за вонредни состојби од 1977 година, кој му дава на претседателот широки овластувања да ги регулира меѓународните трансакции, изјавија извори за „Вашингтон пост“.
Едно лице запознаено со размислувањето на администрацијата додаде дека Белата куќа верува дека, во комбинација со дополнителни царини за сектори како што се автомобилската и фармацевтската индустрија, може да се соберат повеќе од 6 билиони долари како нов федерален приход.
Претставниците на администрацијата исто така разговараат за користење на тие приходи за финансирање даночни поврати или исплати на дивиденди на повеќето Американци, но планирањето за таква мерка е многу прелиминарно, велат изворите.
Белата куќа сè уште размислува за регулатива со која би се применувале различни царини за поединечни земји, велат изворите. Трамп вчера се осврна на реципрочните царини. „Што и да ни наплатат, ние ќе им наплатиме.
Портпаролката на Белата куќа одби да коментира. Луѓето кои се запознаени со ова прашање нагласија дека Трамп секогаш може да го промени своето мислење, но претседателот во последните денови се залагаше за универзални царини. „Би почнале со сите земји“, им рече Трамп на новинарите на „Ер Форс 1“.
Вилбур Рос, кој беше секретар за трговија за време на првиот мандат на Трамп, рече дека Белата куќа размислува да постави единствена царина на увозот меѓу 15 и 25 отсто. Тој рече дека претставниците на администрацијата дебатираат за сложеното прашање за прилагодување на постојните царини за да се исполнат новите цели.
Конечната одлука му припаѓа на Трамп
Додека секретарот за финансии Скот Бесент предложи различни царини за секоја земја, претставниците на администрацијата се претпазливи дека тоа би можело да поттикне затајување царини со испраќање стоки прво во земји со пониски увозни давачки.
Рос ги призна несогласувањата меѓу главните соработници на Трамп. „Има некои луѓе во Белата куќа кои несомнено се поекстремни во однос на царините од Бесент или министерот за трговија Хауард Лутник.
Сепак, тој рече дека нема да има несогласувања откако Трамп ќе донесе одлука, за разлика од приговорите на членовите на кабинетот што го одбележаа неговиот прв мандат.
„Овој пат, за разлика од минатиот пат, конечната одлука му припаѓа на Трамп и сите ќе се согласат со неговата одлука“, рече тој.
Царините имаат влијание врз економијата уште пред да бидат објавени
Царините на Трамп веќе оставија белег на економијата и финансиските пазари уште пред да бидат објавени и ја намалија нивната популарност меѓу граѓаните.
Очекувањата на потрошувачите за економската иднина паднаа во март на најниско ниво во последните 12 години, според истражувањето на Конференцискиот одбор.
Индексот „S&P 500“ изгуби 8 отсто од својата вредност, откако Трамп првпат го спомна неговиот план за „реципрочни“ царини во средината на февруари.
„Она што го видовме во последните неколку недели е поголем фокус на ризиците од забавување на растот“, рече Метју Луцети, главен економист на „Deutsche Bank“ за САД.
Речиси две третини од Американците се незадоволни од управувањето со трговијата на Трамп. Во анкетата на „AP-NORC“ објавена во понеделникот, 38 отсто од испитаниците го одобрија начинот на кој претседателот управува со трговијата со другите земји, додека 60 отсто изразија неодобрување. Резултатите доаѓаат од истражувањето спроведено помеѓу 20 и 24 март на примерок од 1.229 возрасни лица.
Како што се приближува најавата на Трамп за 2 април, инвестициските банки на Волстрит почнаа да ги намалуваат своите економски прогнози. Под претпоставка дека Трамп ќе наметне нови царини од 15 отсто, економијата ќе забави до годишна стапка на раст од само 1 отсто до крајот на годината, според Goldman Sachs, која гледа повеќе од една третина шанса за рецесија во следната година.