Обезбедувач на премиерот под истрага за одавање тајни

Член на обезбедувањето на премиерот Христијан Мицкоски е под истрага поради одавање службени тајни. Кривичниот суд во Скопје во одреди 30 дена притвор, еден ден по обелоденувањето на информацијата дека полицијата привела полицаец од Одделот за заштита на определени личности, откако при претрес на возило во кое бил со уште едно лице е пронајден ранец со службени материјали од МВР. Од опозициската СДСМ прашуваат кој му ги давал доверливите информации. 

Кој му дозволил пристап до доверливи информации? 

Партијата прашува дали обезбедувањето на премиерот работело самоволно или било испратено да пренесе информации бидејќи тој „согласно своите надлежности, нема пристап до доверливи податоци“.

„Пред само неколку месеци, шефот на неговотообезбедување претепа полициски службеници и спречи полициска акција за сузбивање на дрога – настан што и тогаш МВР се обидуваше да го прикрие. Вчера, неговиот личен избор за обезбедување беше фатен како оддава службени тајни на лица од Грчец. МВР цел ден се обидуваше да го скрие скандалот, но под притисок на медиумите кои ја дознаа вистината, беше принудено да излезе со информација во јавноста. Ова ли се луѓето што ќе го ‘ресетираат’ системот?“, велат од СДСМ.

Претреси на повеќе локации 

Полицијата во понеделникот (31.04) информираше дека акцијата била реализирана по претходно добиени сознанија во врска со сторено кривично дело оддавање службена тајна по член 360 од Кривичниот законик. Истражните дејствија се одвивале на подрачјето на Секторот за внатрешни работи (СВР) Велес каде биле извршени претреси на дом, возила и лица. Дополнително, при извршени претреси на повеќе локации, според информациите, пронајдени и одземени биле електронски уреди, службени документи и други предмети релевантни за истрагата. За случајот ќе биде поднесена кривична пријава за оддавање службена тајна. 

„Нема да има милост за криминогените“ 

Од владејачката ВМРО-ДПМНЕ велат дека нема да има милост за криминогените, без разлика на тоа во која партија членуваат. „Законот за сите подеднакво ќе важи. Кога последен пат бил уапсен член на обезбедување на премиер? А, ќе потсетиме дека Заев и СДС го имаа „Сашо ќе пукам“, потоа премиерски телохранител со потекло од струмичко, со по неколку пријави за тешко насилство, кои поминуваа нечепнати, ниту одговараа пред законот“, велат од партијата. 

Наместо да ја поздрават акцијата на МВР и да научат како државата мора да ги победува тие кои ја злоупотребуваат, од ВМРО-ДПМНЕ посочуваат дека СДСМ „како дете на кое ништо не може да му се погоди само реагираат колку да кажат нешто“.

„На СДС не му сметаше тоа што ДУИ владееше со улиците во Скопје и што заедно со мафијашките кланови, кои сега се зад решетки, хараа и уништуваа животи низ главниот град преку рекети, дрога, убиства, лихва, тогаш СДС молчеше и соработуваше со нив, но сега им смета тоа што се апсат сите кои несовесно се однесуваат со службата. Вакво лицемерите ниту имало ниту ќе има. Токму затоа и поддршката на СДС е нецели седум проценти. Ако не апси МВР лица блиски до ВМРО-ДПМНЕ,  тогаш СДС обвинува за селективност,  ако апси МВР блиски до ВМРО-ДПМНЕ, тогаш СДС обвинува друго“, реагираат од партијата.

Тие се децидни дека критиките нема да ги поколебаат во бескомпромисната борба против корупцијата и злоупотребите во Северна Македонија, што е рак рана на македонското општество и што како начин на однесување е сериозен проблем за институциите.