Кошаркарот на Панатинаикос, Кендрик Нан е избран за најкорисен играч на Евролигата во сезоната 2024/2025.

Американецот ги предводеше атинските „зелени“ до третото место во регуларниот дел (22-12). Покрај МВП наградата тој ја доби наградата „Алфонсо Форд“, која му ја доделува на најдобриот стрелец на елитното европско натпреварување.

Поранешниот играч на Мајами имаше просек од 21,1 поен по натпревар, заедно со 3,6 скока и 4,3 асистенции, со просечен индекс на корисност од 20,3.

Миленикот на навивачите на Панатинаикос и човекот кој им ја донесе минатогодишната европска шампионска титула сезонава четири пати постигна 30 или повеќе поени на еден натпревар, а жртви беа екипите на Олимпија Милано (39), Ефес (36), Монако (37) и Црвена Звезда (31).

Главни конкуренти на Нан за наградата МВП му беа брилијантното крило на Олимпијакос и најкорисен играч за сезоната 2022/2023, Саша Везенков, но и фантастичниот плејмејкер на Париз и македонската репрезентација, Ти Џеј Шортс.

Нан, заедно со Везенков и Шортс, беше избран во првата петорка на ЕЛ заедно со Најџел Хејс-Дејвис и Карсен Едвардс.

Интер и Наполи во последните пет рунди во Серија влегуваат со ист број на бодови. Доколку така остане до крајот ќе се случи нешто несекојдневно, поточно ќе се случи сценарио кои само еднаш е забележано во Серија А.

Рикардо Орсолини со ножички во 93.минута, вчера го 2пресече“ Интер. Болоња победи со 1:0 си ги задржа шансите за пласман на четвртата позиција и место во Лигата на шампионите, а Наполи го изедначи со Интер. Двата тима имаат по 71 бод.

Скудетото ќе се решава во фотофинишот, а се чини дека во подобра позиција е тимот од градот под Везув.

Избраниците на Антонио Конте до крајот нема да се соочат со екипи од горната половина на табелата, освен ако не го броиме 10.пласираниот Торино. Наполи ќе се судри со Лече (17.), Џенова (13.), Парма (16.) и Каљари (15.), додека Интер е пред многу потешка задача.

Тимот предводен од Симоне Инзаги ќе се соочи со Рома (6), Верона (14), Торино (10), Лацио (7) и Комо (12). Доколку ривалите од споменатите дуели излезат со исто бодовно салдо, шампионот ќе го одреди необично правило.

Имено, Италијанската фудбалска асоцијација минатата сезона воведе правило кое вели дека доколку водечките тимови бодовно се изедначени на крајот од сезоната, дополнителен натпревар ќе го одреди шампионот.

Резултатот меѓусебните дуели и гол разликата не важат, освен кога се одредува домаќинството. Според споменатите параметри тоа би бил Интер кој има подобар сооднос на постигнати и примени голови (71:32 наспроти 52:25).

Сепак, постои можност Италијанската асоцијација да се одлучи за неутрален терен, што беше случај кога Интер и Болоња го играа натпреварот за трофејот во 1964 година.

Тој се одигра на Олимпискиот стадион во Рим, а екипата од Емилија Ромања извојува неочекувана победа со резултат 2:0.

Фудбалските фанови и вљубените ширум Апенините ги очекува исклучително возбудлив крај на сезоната, а оние неутралните сигурно ќе се надеваат токму на таков историски исход.

Не може да биде поправедно – победникот зема се.

Бразилската суперѕвезда Нејмар е блиску до крајот на кариерата, тврдат бразилските, но и европските и светските медиуми.

Фудбалерот на Сантос пред неколку дена заработи нова повреда, само 34 минути откако се врати во стартниот состав на својот тим против Атлетико Минеиро во бразилската Серија А.

Нејмар го напушти теренот во солзи, поради болки во бутниот мускул на левата нога, истата онаа поради која претходно го паузираше шест недели.

Тој во пресрет на натпреварот доби специјален дрес со бројот 100, во чест на својот 100-ти настап на стадионот „Вила Белмиро“, но лесно може да се случи тој натпревар да е последен во неговата кариера.

„Сега навистина мораме да се молиме да не е нешто сериозно што ќе го оддалечи долго време од терените“, рече тренерот Цезар Сампајо.

Од неговото враќање од Саудиски Ал-Хилал, Нејмар забележа само осум настапи и постигна три гола за Сантос.

Последен пат за Бразил играше во октомври 2023 година, кога ги повреди вкрстените лигаменти.

Само во последните три години тој пропушти вкупно 249 натпревари, а во тој период одигра само 20 натпревари за Ал Хилал и Сантос.

Уште „полудо“ е што од 2013 година до денес имаше вкупно 42 евидентирани повреди и како резултат на тоа 1.445 дена поминати надвор од теренот.

Само во ПСЖ поради повреди пропушти 136 натпревари.

Поради сето ова, медиумите пишуваат дека 33-годишниот фудбалер дошол до крајот на кариерата и дека тоа и официјално наскоро ќе го објави.