Техеран/Москва, 2 април 2025 (МИА) - Иранскиот заменик министер за надворешни работи Маџид Тахт Раванчи и неговиот руски колега Сергеј Рјабков денеска разговараа за тековните преговори поврзани со иранската нуклеарна програма, соопшти руското Министерство за надворешни работи.

Министерството известува дека двајцата дипломати разговарале за заедничките чекори за стабилизирање на ситуацијата и „намалување на тензиите кои вештачки и неоправдано ги поттикнуваат западните земји“.

Руското Министерство објави дека употребата на воена сила против Иран и напад врз нејзината нуклеарна инфраструктура ќе бидат „незаконски и неприфатливи“, бидејќи тие ќе предизвикаат „големи и неповратни радиолошки и хуманитарни последици“ за Блискиот Исток и светот, пренесуваат британските медиуми.

Претходно годинава Кремљ понуди да посредува меѓу САД и Иран, со кои Москва потпиша договор за стратешко партнерство во јануари.

Американскиот претседател Доналд Трамп, во своето прво обраќање откако Иран ги отфрли директните преговори со Вашингтон, во текот на викендот, за Ен-Би-Си Њуз изјави дека Техеран може да се соочи со бомбардирање и секундарни царини доколку не се постигне договор за неговата нуклеарна програма.сд/

фото:МИА архива