Претседателот на Република Српска, Милорад Додик, вечерва се врати во Бања Лука, а моментално гостува на Радио-телевизија РС, каде повтори дека претседателот на Србија, Александар Вучиќ, го информирал дека Интерпол одбил да распише централна потерница за него и за претседателот на Парламентот на РС, Ненад Стеванди.
Тој им се заблагодари на Србија, Унгарија, Црна Гора и Русија и, како што рече, и на некои земји кои побарале од Интерпол да не издава црвена потерница по него, наведувајќи дека барањето на Судот на Босна и Херцеговина за распишување меѓународна потерница по него е политички мотивирано.
„Одлуката што ја донесе Интерпол за отфрлање на барањето на неуставниот суд на Босна и Херцеговина за издавање црвена потерница е правилна одлука, која ја очекував“, рече Додик.
Тој додаде дека Интерпол „не е во функција на Сараево, кое дознало дека некој секогаш им ги исполнува желбите“.
„Тоа е вистинската одлука, ја очекував, бидејќи ако има правда во светот, таква треба да биде“, рече Додик.
Тој понатаму рече дека РС „мора да врати се што уништија од политичко Сараево“. Тој оцени дека целта на обвинувањата на Обвинителството и Судот на БиХ не е тој или лично Стевандиќ, туку се е насочено кон запирање на Република Српска.
„Никој не може да ја запре Србија. Јас одлично знам што правам и убеден сум дека сум на вистинскиот пат“, изјави Додик.
Запрашан како се вратил во РС, бидејќи по него има централна потерница во Босна и Херцеговина, тој изјави дека се вратил на истиот начин „заминал“, со автомобил, преку редовниот граничен премин.
